„Það hefur orðið talsverð breyting á frá því að ég spilaði síðast í deildinni 2015. En aðalatriðið er að við höfum farið vel af stað. Það hefur verið tekið vel á móti mér og ég mjög glaður og sáttur,“ sagði Ragnar Jóhannsson handknattleiksmaður hjá Selfoss þegar handbolt.is hitti hann að máli eftir viðureign Selfoss og ÍR í íþróttahúsinu í Austurbergi í gærkvöld þar sem Ragnar og félagar höfðu unnið tíu marka sigur, 28:18, í Olísdeildinni.
Ragnar flutti heim um áramótin eftir nærri sex ára veru í Þýskalandi og gekk til liðs við uppeldisfélag sitt. „Ég er bara mjög sáttur. Ég hef ekki fyrr leikið með einhverjum leikmanna Selfoss svo það getur tekið sinn tíma að kynnast samherjunum á vellinum. Ég reikna með við náum að stilla okkur betur saman og verða enn sterkari liðsheild þegar kemur lengra inn á keppnistímabilið.“
Ragnar segir sitt hlutverk í liðinu vera skýrt, jafnt í vörn sem sókn. „Ég vil bera ábyrgð og skila mínu til liðsins. Það hefur gengið ágætlega fram til þessa að mínu mati,“ sagði Ragnar en margir telja að hann hafi verið það púsl sem vantaði inn í myndina hjá Selfoss-liðinu, þ.e. örvhentur sóknarmaður, sterkur varnarmaður að því ógleymdu að vera heimamaður.
„Styrkleiki deildarinnar hefur komið mér ánægjulega á óvart. Enginn leikur í deildinni er auðveldur. Taka verður alla andstæðinga alvarlega,“ sagði Ragnar Jóhannsson, handknattleiksmaður Selfoss.
Ragnar og samherjar í Selfossi sækja Fram heim í næstu umferð Olísdeildarinnar á sunnudaginn.
