Einn farinn og annar að hugsa sér til hreyfings

Kristinn Björgúlfsson þjálfari ÍR. Mynd/Egill Bjarni Friðjónsson

Handknattleiksmaðurinn Björgvin Páll Rúnarsson hefur náð samkomulagi við ÍR um að samningi sínum við félagið verið rift. Björgvin Páll kom til ÍR á síðasta sumri frá Fjölni. Hann náði sér ekki á strik með ÍR-liðinu á keppnistímabilinu. Meiðsli settu m.a. strik í reikninginn í tvígang og gerðu honum erfitt um vik að skjóta rótum hjá Breiðholtsliðinu.

Björgvin Páll lék aðeins 10 leiki með ÍR í Olísdeildinni í vetur og skoraði 12 mörk. Hann var meðal bestu leikmanna Fjölnis um nokkurra ára skeið og var m.a. í stóru hlutverki í þau tvö skipti sem Fjölni fór upp í Olísdeildina, vorið 2017 og aftur 2019.


Björgvin Páll mun ekki vera eini leikmaður ÍR sem er að yfirgefa liðið nú þegar það er fallið í Grill 66-deildina. Varnarmaðurinn sterki og línumaðurinn öflugi, Úlfur Gunnar Kjartansson, mun vera að horfa í kringum sig þessa dagana. Eftir því sem næst verður komist hafa lið í Olísdeildinni rennt hýru auga til Úlfs Gunnars sem eins og Björgvin Páll var nokkuð frá keppni á keppnistímabilinu vegna meiðsla.

- Auglýsing -

Nýjustu fréttir

- Auglýsing -