Árni Bragi Eyjólfsson var markahæstur KA-manna í dag. Mynd/Egill Bjarni Friðjónsson.

Botnlið ÍR sótti ekki gull í greipar KA-manna í heimsókn sinni í KA-heimilið í dag þar sem liðin leiddu saman hesta sína. Segja má að um einstefnu hafi verið að ræða frá upphafi til enda. Alls voru skoruð 24 mörk í hvorum hálfleik. KA vann með 16 marka mun, 32:16, eftir að hafa verið átta mörkum yfir í hálfleik, 16:8. Einstakt er að bæði lið skoruðu jafn mikið í hvorum hálfleik.


KA-menn eru þar með komnir upp í sjöunda sæti deildarinnar með sjö stig eins og Fram sem er sæti neðar. ÍR er enn án stiga.

Nicholas Satchwell, markvörður KA, var vel á verði í leiknum við ÍR í dag. Hér mætir hann Ólafi Atla Malmquist. Mynd/Egill Bjarni Friðjónsson


KA-liðið réði lögum og lofum í leiknum frá upphafi til enda. Vörn liðsins var afar góð og færeyski landsliðsmarkvörðurinn Nicholas Satchwell reyndist ÍR-ingum einkar óþægur ljár í þúfu. Hann varði nærri annað hvert skot sem kom á markið. Auk þess fóru Áki Egilsnes og Einar Birgir Stefánsson mikinn í vörninni.

Kristinn Björgúlfsson, þjálfari ÍR, messar yfir sínum mönnum. Mynd/Egill Bjarni Friðjónsson


Ljóst var að ÍR-ingar voru ekki alveg búnir að jafna sig eftir vonbrigðin á miðvikudaginn þegar þeir misstu ágæta stöðu niður í tap gegn Stjörnunni. Þeir náðu aldrei vopnum sínum að þessu sinni.

Mörk KA: Árni Bragi Eyjólfsson 6/1, Áki Egilsnes 4, Einar Birgir Stefánsson 4, Patrekur Stefánsson 4, Allan Norðberg 3, Ólafur Gústafsson 3, Jóhann Geir Sævarsson 3, Þorri Starrason 1, Jón Heiðar Sigurðsson 1, Sigþór Gunnar Jónsson 1, Andri Snær Stefánsson 1, Daði Jónsson 1.
Varin skot: Nicholas Satchwell 14 – 46,7%.
Mörk ÍR: Viktor Sigurðsson 3, Ólafur Malmquist 2, Ólafur Haukur Matthíasson 2, Gunnar Valdimar Johnsen 2, Hrannar Ingi Jóhannsson 2, Dagur Sverrir Kristjánsson 2, Andri Heimir Friðriksson 1, Sveinn Brynjar Agnarsson 1, Eggert Sveinn Jóhannsson 1.
Varin skot: Óðinn Sigurðsson 4, 26,7% – Ólafur Rafn Gíslason 3, 13%.

- Auglýsing -

Nýjustu fréttir

- Auglýsing -