Eitt hundrað áhorfendur og allt samkvæmt bókinni

Leikmenn Vipers ætla í úrslit Meistaradeildar í fyrsta skipti. Mynd/EPA

Vipers Kristiansand varð í gærkvöld norskur meistari í handknattleik kvenna þegar liðið vann Stohamar, 34:25, í úrslitaleik í Aquarama í Kristiansand. Þetta er fjórða árið í röð sem Vipers verður norskur meistari í kvennaflokki en liðið hefur haft yfirburði í deildinni síðan stórliðið Larvik flosnaði upp.


Úrslitaleikurinn í gær varð aldrei spennandi. Vipers gaf tóninn snemma með því að skora fimm fyrstu mörkin og sex af fyrstu sjö. Storhamar liðið náði sér aldrei á strik eftir þessa góðu byrjun meistaranna. Sjö marka munur var á liðunum að loknum fyrri hálfleik, 18:11.

Þetta var fyrsti leikurinn í norsku úrvalsdeildinni síðan í janúar að keppni í tveimur efstu deildum karla og kvenna var sett í salt vegna baráttunnar við kórónuveiruna. Nú hefur rofað til í Noregi og ákveðið var að setja úrslitaleikinn á dagskrá. 100 áhorfendur voru viðstaddir leikinn í Aquarama.


Nora Mørk var markahæst hjá Vipers með sjö mörk, Henny Reistad skoraði sex og Heidi Løke fimm. Guro Nestaker var markahæst hjá Storhamar með fimm mörk og Maja Jakobsen skoraði fjögur mörk.


Vipers á tvo leiki eftir á keppnistímabilinu því í lok maí tekur liðið þátt í úrslitahelgi Meistaradeildar Evrópu í Búdapest.


Axel Stefánsson, fyrrverandi landsliðsþjálfari kvenna, tekur við þjálfun Storhamar í sumar.

- Auglýsing -

Nýjustu fréttir

- Auglýsing -