Haukum urðu ekki á nein axarsköft í kvöld þegar þeir mættu Aftureldingu öðru sinni í átta liða úrslitum Olísdeildar karla í handknattleik í Schenkerhöllinni. Eftir tíu marka sigur í fyrri viðureigninni var það nánast formsatriði fyrir Hauka að komast áfram sem og varð raunin.
Deildarmeistararnir unnu öruggan sigur, 36:22, eftir að hafa verið fjórum mörkum yfir eftir fyrri hálfleik, 16:12.
Haukar mæta þar með annað hvort Selfossi eða Stjörnunni í undanúrslitum en síðarnefnd liðin tvö ljúka uppgjöri sínu annað kvöld í Hleðsluhöllinni á Selfoss. Sterkt lið Hauka gaf ekki færi á sér í byrjun leiks og þar með var tónninn gefinn.
Gunnar Magnússon, þjálfari Aftureldingar, nýtti tækifærið og gaf mörgum yngri og lítt eða óreyndari leikmönnum tækifæri til þess að láta ljós sitt skína í leiknum þegar á leið og ljóst að Mosfellingar væru ekki líklegir til þess að veita deildarmeisturunum skráveifu að þessu sinni. Þess utan sem sjö leikmenn Aftureldingar eru á sjúkralista þótt einn þeirra, Þorsteinn Leó Gunnarsson hafi reyndar verið á skýrslu að þessu sinni eins og markvörðurinn Arnór Freyr Stefánsson sem var aðeins á skýrslu að nafninu til. Vegna þess varð munurinn óþarflega mikill þegar upp var staðið.
Mörk Hauka: Ólafur Ægir Ólafsson 5, Atli Már Báruson 5, Orri Freyr Þorkelsson 4/1, Darri Aronsson 4, Geir Guðmundsson 3, Stefán Rafn Sigurmannsson 3/1, Þorfinnur Máni Björnsson 3, Þráinn Orri Jónsson 2, Halldór Ingi Jónasson2, Brynjólfur Snær Brynjólfsson 2, Tjörvi Þorgeirsson 1, Adam Haukur Baumruk 1, Jakob Aronsson 1.
Varin skot: Andri Sigmarsson Scheving 6, 37,5% – Björgvin Páll Gústavsson 5, 29,4%.
Mörk Aftureldingar: Blær Hinriksson 7, Úlfar Páll Monsi Þórðarson 5, Hafsteinn Óli Ramos Rocha 3, Bergvin Þór Gíslason 3, Valur Þorsteinsson 2, Einar Ingi Hrafnsson 1, Gunnar Kristinn Þórsson 1.
Varin skot: Brynjar Vignir Sigurjónsson 11, 23,9%.
