Ekkert fær stöðvað Aron og samherja

Leikmenn Barcelona og Granolles tóku daginn snemma og hófu leik fyrir hádegið í upphafsleik 13. umferð spænsku 1. deildarinnar í handknattleik karla. Það virtist ekki hafa slæm áhrif á leikmenn Barcelona sem fögnuðu í leikslok sínum þrettánda sigri í deildinni á leiktíðinni, 41:27. Leikurinn fór fram í Granolles. Staðan í hálfleik var, 23:16.

Þetta var 56. leikur Barcelona í röð án taps. Liðið er sem fyrr með fullt hús stiga í efsta sæti deildarinnar, alls 26. Granolles situr í níunda sæti með 12 stig en hefur aðeins leikið níu sinnum.

Aron Pálmarsson átti tvö markskot í leiknum en bæði geiguðu. Dika Mem  var markahæstur hjá Barcelona. Hann skoraði níu mörk. Timothey N’Guessan og Alex Pascual García skoruðu sex mörk hvor.