Ekkert fararsnið á Breka og Þorvaldi

Breki Dagsson sækir að vörn Stjörnunnar í Coca Cola bikarnum í október,. Mynd/HSÍ

Breki Dagsson og Þorvaldur Tryggvason hafa báðir framlengt samninga sína við handknattleiksdeild Fram til næstu tveggja ára. Þeir félagar halda þar með áfram að fylgjast að en þeir komu til Fram fyrir tveimur árum frá Fjölni.


Breki skoraði 73 mörk í vetur í þeim átján leikjum sem hann lék í Olísdeildinni og tók oft og tíðum af skarið þegar mestu máli skipti og er skemmst að minnast jöfnunarmarksins við FH í 20. og þriðju síðustu umferð Olísdeildarinnar.


Þorvaldur skoraði 22 mörk í 15 leikjum og lét svo sannarlega til sín taka í vörninni hvar hann var aðsópsmikill.


„Við flytjum í nýja og glæsilega aðstöðu á næstu dögum og er stefnan sett á að mæta með enn sterkara lið til keppni næsta vetur. Þessir tveir leikmenn spila stóra rullu í því að við í Fram getum stigið næsta skref í þeirri þróun sem við höfum verið í,“ segir Bjarni Kristinn Eysteinsson formaður handknattleiksdeildar Fram í tilkynningu sem handknattleiksdeildin sendi frá sér um miðjan dag.


Fram hafnaði í áttunda sæti Olísdeildar á dögunum og mætir deildarmeisturum Vals í fyrstu umferð átta liða úrslita í Origohöllinni klukkan 19.30 í kvöld. Breki og Þorvaldur láta sig vart vanta í þá viðureign.

- Auglýsing -

Nýjustu fréttir

- Auglýsing -