Ekki með fullskipað lið til Montpellier

Aron Dagur Pálsson er kominn til Noregsmeistara Elverum. Mynd/Alingsås

Sænska liðið Alingsås, sem Aron Dagur Pálsson leikur með, verður ekki fullskipað þegar það mætir Montpellier í Evrópudeildinni í handknattleik á þriðjudaginn. Smit greindist hjá sænska liðinu í dag og að minnsta kosti tveir leikmenn eru komnir í sóttkví af þeim sökum.

Aron Dagur er ekki í hópi þeirra smituðu. Hann staðfesti það við handbolta.is áðan.

Smitin munu ekki létta Aroni Degi og félögum róðurinn í Frakklandi. Auk smitanna þá er meiðslalisti liðsins langur. Hann er í óða önn að pakka niður til ferðarinnar enda skal lagt af stað með flugi klukkan sex árdegis í fyrramálið.

Áður en lið halda í leiki í Evrópukeppninni verða þau að ganga úr skugga um að ekkert smit sé innan þeirra raða. Af þeim sökum fóru allir leikmenn Alingsås í skimun í gær.

Fyrr á leiktíðinni smituðust fimm leikmenn Alingsås, að öllum líkindum eftir ferð til Króatíu þar sem liðið lék í Evrópudeildinni.

Alingsås kom mörgum á óvart á þriðjudaginn þegar það lagði Magdeburg á heimavelli í Evrópudeildinni.

- Auglýsing -

Nýjustu fréttir

- Auglýsing -