Elín Jóna hélt uppteknum hætti frá Ásvöllum

Elín Jóna Þorsteinsdóttir markvörður hefur verið frábær á keppnistímabilinu. Mynd/Ringköbing Håndbold

Stórleikur Elínar Jónu Þorsteinsdóttur, landsliðsmarkvarðar, dugði liði hennar, Ringköbing Håndbold ekki til sigurs á heimavelli í kvöld þegar það mætti Silkeborg-Voel í dönsku úrvalsdeildinni í handknattleik en þá var þráðurinn tekinn upp á ný eftir hlé vegna landsleikja.


Elín Jóna varði 15 skot í marki Ringköbing sem tapaði með tveggja marka mun, 26:24. Þessi frammistaða lagði sig út á 38,4% hlutfallsmarkvörslu. Elín Jóna hélt þar með áfram þar sem frá var horfið úr landsleiknum við Serba á Ásvöllum á sunnudaginn þar sem hún stóð sig einstaklega vel og var fyrir vikið valin í úrvalslið 1. og 2. umferðar undankeppni EM.


Átta mínútum fyrir leikslok var staðan jöfn, 23:23. Silkeborg-Voel var tveimur mörkum yfir í hálfleik, 14:12.


Ringköbing, sem er nýliði í deildinni, er í 11. sæti með fjögur stig að loknum sjö leikjum. Silkeborg-Voel situr í sjötta sæti með sjö stig. Fjórtán lið eru í dönsku úrvalsdeildinni í kvennaflokki.

- Auglýsing -

Nýjustu fréttir

- Auglýsing -