- Auglýsing -
Staðfest hefur verið að færeyski handknattleiksmaðurinn Elias Ellefsen á Skipagøtu hefur samið við þýska stórliðið THW Kiel frá og með sumrinu 2023. Kiel segir frá þessu í morgun og að samningur hans við félagið sé til fjögurra ára, fram til lok júní 2027.
Ellefsen stendur á tvítugu og verður fyrsti færeyski handknattleiksmaðurinn til þess að leika með Kiel og aðeins annar Færeyingurinn til þess að leika í þýsku 1. deildinni. Hinn er Johan á Plógv Hansen liðsmaður Flensburg. Hansen leikur reyndar fyrir danska landsliðið.
Ellefsen lék upp yngri flokka með H71 í Hoyvík í Þórshöfn. Hann hefur undanfarin tvö ár leikið með IK Sävehof í Svíþjóð og verið í burðarhlutverki. Sama má segja um hlutverk hans í færeyska landsliðinu en A-landsleikirnir eru fimm og mörkin 32.
Ellefsen fór á kostum með U20 ára landsliði Færeyinga á Evrópumótinu í Porto í sumar þegar Færeyingar unnu m.a. Dani í fyrsta sinn í opinberum kappleik í flokkaíþróttum.
Samningur Ellefsen til Kiel til fjögurra ára er enn ein staðfestingin á þeim uppgangi sem er í færeyskum handknattleik og sýndi sig m.a. á árangri landsliða frænda okkar á EM U20 og U18 landsliða karla í sumar og á HM U18 ára landslið kvenna.
- Auglýsing -
