- Auglýsing -
Elliði Snær Viðarsson skoraði tvö mörk fyrir Gummersbach þegar liðið endurheimti efsta sæti þýsku 2. deildarinnar í handknattleik í kvöld með sigri á TV Emsdetten, 32:29, á heimavelli. Jafnt var að loknum fyrri hálfleik, 14:14. Gummersbach sagði skilið við andstæðing sinn um miðjan síðari hálfleik og var mest fimm mörkum yfir.
Guðjón Valur Sigurðsson er þjálfari Gummersbachliðsins sem hefur nú 38 stig eftir 24 leiki. Nordhorn hefur einnig 38 stig en hefur leikið einum leik fleira. Önnur lið deildarinnar eru sem stendur langt á eftir og virðast ekki ógna tveimur efstu liðunum á leið þeirra upp í 1. deild.
Örn Vésteinsson Östenberg skoraði tvö mörk fyrir TV Emsdetten úr fjórum skotum. Anton Rúnarsson skoraði ekki mark fyrir liðið en átti tvær stoðsendingar. Emsdetten er í 15. sæti af 20 liðum deildarinnar með 19 stig að loknum 26 leikjum.
- Auglýsing -
