EM: Elvar Örn á eitt af mörkum umferðarinnar – myndskeið

Elvar Örn Jónsson á eitt af fimm bestu mörkum fjórðu umferðar undankeppni EM2022 í samantekt Handknattleikssambands Evrópu, EHF.

Markið sem um er að ræða var 29. mark íslenska landsliðsins gegn Portgúal í Schenkerhöllinni á sunnudaginn. Markið var eitt fimm marka Elvars Arnar í leiknum. Með markinu kom Elvar Örn íslenska landsliðinu í tíu marka forskot, 29:19, en leiknum lauk með níu marka sigri Íslands, 32:23.

Elvar Örn er með íslenska landsliðinu í Kaíró í Egyptalandi en á fimmtudaginn hefst þátttaka Íslands á mótinu með leik við Portúgal.

Hér fyrir neðan má sjá mörkin fimm. Mark Elvars Arnar er það þriðja í röðinni á þessu myndskeiði frá EHF.