Með miklum endaspretti tókst FH-ingum að tryggja sér bæði stigin í heimsókn sinni til Stjörnunnar í TM-höllina í kvöld í leik liðanna í Olísdeildinni handknattleik. Á síðustu fimm mínútum leiksins skoruðu FH-ingar sex mörk gegn aðeins einu frá Stjörnumönnum og unnu þar með þriggja marka sigur, 30:27. Hafnarfjarðarliðið var tveimur mörkum yfir að loknum fyrri hálfleik, 15:13.
FH er með átta stig eins og Valur og ÍBV í þremur efstu sætum deildarinnar en hefur leikið sex sinnum á meðan Valur og ÍBV eiga fimm leiki að baki, hvort lið. Stjarnan er í áttunda sæti með þrjú stig eftir fimm leiki.
FH-liðið var með yfirhöndina framan af síðari hálfleik. Stjarnan komst fyrst yfir, 24:23, þegar tíu mínútur voru eftir. Áfram hélt Stjörnuliðið frumkvæðinu næstu mínútur. Hinsvegar fór allt í skrúfuna hjá þeim á endasprettinum og reynt og vel samstillt lið FH fagnaði öðrum sigri sínum á fjórum dögum í Olísdeildinni.
Mörk Stjörnunnar: Leó Snær Pétursson 10/5, Ólafur Bjarki Ragnarsson 6, Tandri Már Konráðsson 6, Dagur Gautason 3, Pétur Árni Hauksson 2.
Varin skot: Adam Thorstensen 10 – 26%.
Mörk FH: Ágúst Birgisson 6, Leonharð Þorgeir Harðarson 5, Ásbjörn Friðriksson 4/1, Einar Örn Sindrason 3, Birgir Már Birgisson 3, Arnar Freyr Ársælsson 3, Einar Rafn Eiðsson 3, Jakob Martin Ásgeirsson 2, Egill Magnússon 1.
Varin skot: Phil Döhler 18 – 46%.
Tölfræði er fengin hjá Vísi.is.
Staðan og næstu leikir á nýrri síðu á handbolti.is.
