Lúðvík Thorberg Arnkelsson var ekki í leikmannahópi Gróttu í sigri liðsins, 26:20, á Selfossi í 11. umferð Olís-deildar karla á mánudagskvöld.
„Lúðvík varð fyrir því óláni að hrökkva úr lið á fingri á síðustu æfingu fyrir FH-leikinn í janúar og missti af þeirri ástæðu af tveimur leikjum í framhaldinu. Eftir það lék hann tvo leiki vel teipaður,“ sagði Arnar Daði Arnarsson, þjálfari Gróttu við handbolta.is í morgun.
„Lúðvík fór í læknisskoðun á mánudaginn og var þá meinað af lækni að spila áfram. Hann verður þar af leiðandi að halda sér frá boltaæfingum um skeið. Endurhæfing gengur hægar en búist var við. Þess vegna er framhaldið óljóst hjá honum á næstunni,“ sagði Arnar Daði ennfremur.
Grótta mætir Haukum í 12. umferð Olísdeildarinnar á mánudaginn. Grótta situr í 10. sæti deildarirnar með níu stig að loknum 11 leikjum, er stigi á eftir Fram og fimm stigum á undan Þór sem er í 11. sæti.
