Engin Evrópukeppni hjá Bjarna og félögum

Bjarni Ófeigur Valdimarsson leikmaður Skövde t.v. Mynd/Aðsend

Bjarni Ófeigur Valdimarsson og samherjar hans í sænska handknattleiksliðinu IFK Skövde HK taka ekki þátt í Evrópukeppni á næsta keppnistímabili. Skövde hafnaði í öðru sæti í sænsku úrvalsdeildinni í vor og tapað fyrir Ystad í úrslitaeinvígi um meistaratitilinn og á rétt á sæti í Evrópubikarkeppninni, European cup.


Forráðamenn Skövde segja fjárhagslegar ástæður standa að baki þeirri ákvörðun að gefa frá sér þátttöku í Evrópukeppni. Veirufaraldurinn undanfarin tvö ár hafi komið mjög við fjárhag félagsins eins og annarra. Eigið fé félagsins sé undir viðunandi mörkum. Af þessum ástæðum sé rétt halda að sér höndum þegar ljóst sé að verulegur kostnaður fylgir þátttöku í Evrópukeppni.


Skövde tók þátt í Evrópubikarkeppninni á síðasta tímabili í fyrsta sinn síðan keppnistímabilið 2005/2006. Skövde féll úr leik í þriðju umferð Evrópubikarkeppninnar fyrir SKA Minsk frá Hvíta-Rússlandi sem í umferðinni á undan hafði unnið FH.


Frestur til þess að skrá þátttöku í Evrópukeppni félagsliða í karlaflokki rennur út á föstudaginn. Óvíst er hvaða íslensku lið hyggjast óska eftir þátttöku en eftir því sem næst verður komist eiga Valur, KA, Haukar og ÍBV rétt á að taka þátt.


Valur, KA/Þór og ÍBV eru skráð til leiks í Evrópubikarkeppni kvenna en umsóknarfrestur rann út á síðasta föstudag.

a>
- Auglýsing -

Nýjustu fréttir

- Auglýsing -