- Auglýsing -
„Við náðum aldrei takti í sóknarleikinn í síðari hálfleik sem veldur því að við náðum okkur ekki á strik,“ sagði Kári Kristján Kristjánsson leikmaður ÍBV í samtali við handbolta.is í gærkvöld eftir að ÍBV tapaði þriðja leiknum við Hauka á Ásvöllum, 28:25. Leikurinn var einn liður í undanúrslitum Olísdeildar karla í handknattleik. Liðin mætast á ný í Vestmannaeyjum á þriðjudaginn og geta Haukar jafnað metin í þeirri viðureign eða ÍBV tryggt sér sér sæti í úrslitum.
„Vörnin var góð og markvarslan fín en sóknarleikurinn var ekki góður í síðari hálfleik. Við skoruðum 12 mörk í síðari hálfleik þar af eru þrjú eða fjögur mörk í ruslmínútum sem segir að við vorum ekki að gera mikið af viti í sókninni í 20 til 25 mínútur. Því miður,“ sagði Kári ennfremur en hann var einn þeirra Eyjamanna sem komst lítt áleiðis í síðari hálfleik.
Kári Kristján sagði það ekki eiga að koma á óvart þegar komið er í undanúrslit að annað hvort liðið tapi leik. „Við erum ekkert í áfalli vegna tapsins. Næst er bara leikur á heimavelli á þriðjudaginn. Við fyllum húsið heima og klárum verkefnið. Það er ekki stefna okkar að einvígið fari í oddaleik. Við vinnum heima á þriðjudaginn og allir verða sáttir,“ sagði Kári Kristján Kristjánsson, línumaður ÍBV og einn leikreyndasti leikmaður liðsins.
- Auglýsing -
