„Er bara alls ekki sátt“

Karen Helga Dírönudóttir, leikmaður Hauka. Mynd /Haukar

„Ég er bara alls ekki sátt og veit þess vegna ekkert hvað ég á að segja,“ sagði Karen Helga Díönudóttir, leikmaður Hauka, eftir níu marka tap fyrir Fram í 3. umferð Olísdeildar kvenna í handknattleik í Framhúsinu í dag.


„Það var bara eins og alla annað lið kæmi til leiks í síðari hálfleik. Ég veit ekki hvað gerðist hjá okkur. Ég verð hreinlega að sjá leikinn aftur til að átta mig á hvað gerðist eiginlega,“ sagði Karen við handbolta.is þegar hún var að ganga út af leikvellinum.


Haukar voru síst lakara liðið í fyrri hálfleik en í þeim síðari var annað upp á teningnum. „Við lögðum upp með að leika fantavörn og vera duglegar að hlaupa til baka. Það tókst okkur vel í fyrri hálfleik en á fyrstu tíu til tólf mínútum síðari hálfleiks var eins og allt það sem við ætluðum að gera væri gleymt og leikurinn snerist um einstaklinga en ekki liðið. Við verðum að gera betur og læra af þessu,“ sagði Karen Helga og undirstrikaði að mikið meira búi í liði Hauka en það sýndi í síðari hálfleik.


„Við erum með þrusulið, trúðu mér. Við höldum lengur út næst,“ sagði Karen Helga Díönudóttir, leikmaður Hauka eftir tapið fyrir Fram í dag„

- Auglýsing -

Nýjustu fréttir

- Auglýsing -