Erfið byrjun sló Selfoss ekki út af laginu – Rasimas frábær

Vilius Rašimas, markvörður Selfoss t.v. fór á kostum gegn FH. Mynd/Selfoss/SÁ

Selfoss vann inn sín fyrstu stig í Olísdeild karla er liðið vann FH, 27:23, í Set-höllinni á Selfossi í kvöld í viðureign sem fresta varð úr 1. umferð vegna þátttöku Selfossliðsins í Evrópubikarkeppninni í handknattleik fyrr í þessum mánuði. Heimamenn voru tveimur mörkum yfir í hálfleik, 14:12. Þeir léku afar vel lengst af leiksins og áttu FH-ingar í mesta basli.


FH hefur tvö stig einnig eftir tvo leiki í deildinni en þeir unnu Gróttu í fyrstu umferð. FH-ingar byrjuðu leikinn betur í kvöld og skoruðu til að mynda fimm af fyrstu sex mörkunum og átta af þeim 12 sem skoruð voru framan af.


Eftir leikhlé þá sneru leikmenn Selfoss leiknum sér í hag jafnt og þétt. Vel studdir af hópi áhorfenda gáfu heimamenn ekkert eftir. Vilius Rasimas átti frábæran leik í markinu og var með 44% markvörslu. Hann virðist hafa tekið upp þráðinn þar sem frá var horfið á síðustu leiktíð. Góð frammistaða Phil Döhler í marki FH féll í skuggan af stórleik Litáans.


FH-ingar voru aldrei langt undan í síðari hálfleik en lánaðist aldrei að komast yfir og slá leikmenn Selfoss út af laginu.

Elvar Elí Hallgrímsson var frábær í vörn Selfossliðsins og var m.a. með níu löglegar stöðvanir.


Mörk Selfoss: Einar Sverrisson 8/5, Ragnar Jóhannsson 6, Ísak Gústafsson 5, Richard Sæþór Sigurðsson 3, Alexander Már Egan 3, Hergeir Grímsson 2.
Varin skot:
Vilius Rasimas 18, 43,9%.

Mörk FH: Jóhann Birgir Ingvarsson 5, Birgir Már Birgisson 4, Ásbjörn Friðriksson 4, Einar Örn Sindrason 4, Gytis Smantauskas 2.
Varin skot: Phil Döhler 15, 37,5%.

Staðan í Olísdeild karla og næstu leikir er hér.

Öll tölfræði leiksins er hjá HBStatz.

- Auglýsing -

Nýjustu fréttir

- Auglýsing -