Erfiðast að sitja heima í stofu

Björgvin Páll Gústavsson er ómyrkur í máli í garð leikskipulags Olísdeildar. Mynd/EPA

„Ég horfði ekki á leikinn við Portúgal á síðasta miðvikudag í beinni útsendingu þar sem það getur verið ótrúlega erfitt. Ég sá leikinn síðar um kvöldið. Mér finnst auðveldasta verkið að vera inni á leikvellinum. Næst þar á eftir er að sitja á bekknum, þar á eftir að vera í stúkunni en það erfiðasta er fylgjast með landsleikjum heima í stofu,“ sagði Björgvin Páll Gústavsson, landsliðsmarkvörður í handknattleik, sem kemur inn í landsliðshópinn í dag fyrir leikinn við Portúgal eftir að hafa kosið að vera heima þegar landsliðið fór til Portúgal í byrjun liðannar viku.


„Ég horfði á leikinn þrisvar sinnum um kvöldið og leikgreindi andstæðingana um leið. Það verður frábært að koma inn í hópinn og geta aðstoðað strákana í leiknum. Sérstaklega eftir tapið ytra þá er hungur í hópnum að vinna leikinn hér heima og fara með sigur í farteskinu til Egyptalands á mánudaginn. Svo ég tala nú ekki um þegar maður sér brot eins og á Alexander í leiknum á miðvikudaginn. Þá verður maður enn ákveðnari í að vilja vinna þessa menn,“ sagði Björgvin Páll Gústavsson, landsliðsmarkvörður í handknattleik í samtali við handbolta.is í gær.


Viðureign Íslands og Portúgals hefst klukkan 16 í dag í Schenker-höllinni á Ásvöllum. Vegna samkomutakmarkanna mega áhorfendur ekki vera viðstaddir en leiknum við verður sjónvarpað beint hjá RÚV.

- Auglýsing -

Nýjustu fréttir

- Auglýsing -