Forsvarsmenn ungversku Evrópumeistaranna Györ eru byrjaðir að huga að næsta tímabili en félagið tilkynnti í gær að tveir leikmenn gangi til liðs við liðið frá erkifjöndunum í FTC. Um er að ræða Noémi Háfra og Nadine Schatzl en báðar eru þær fastaleikmenn í ungverska landsliðinu.
Schatzl sem er 26 ára gömul er ekki ókunn herbúðum Györ en hún lék með liði félagsins til ársins 2013. Háfra er hinsvegar uppalin hjá FTC og telst það til tíðinda að hún hafi ákveðið að fara til Györ.
„Ég er mjög stolt yfir að fá tækifæri til þess að sanna mig hjá Györ. Ég geri mér vel grein fyrir að ég er að fara í allt annað hlutverk heldur en ég hef verið í hjá FTC undanfarin ár. Ég hef aldrei verið hrædd við áskoranir og ég veit að samkeppnin er mikil en ég mun gera mitt besta til þess að ná árangri með Györn” sagði Noémi Háfra í viðtali við heimasíðu Györ.
