„Satt að segja þá eyðilagði hann landsliðferilinn minn,“ segir hin þrautreynda Galina Gabisova, markvörður rússneska meistaraliðsins Rostov Don um Evgeni Trefilov sem í tvo áratugi var þjálfari rússneska kvennalandsliðsins og stýrði liðinu m.a. þegar það varð Ólympíumeistari í Ríó fyrir fimm árum.
Gabisova hefur í tvo áratugi verið markvörður Rostov Don, eins allra fremsta handknattleiksliðs heims í handknattleik. Hún hefur hinsvegar aldrei náð sér á strik með rússneska landsliðinu og á þrátt fyrir langan og sigursælan feril með félagsliði sínu aðeins 65 landsleiki.
„Hann hefur alltaf verið mér andsnúinn og líkaði ekki við mig sem markvörð,“ segir Gabisova við youtuberásina Seventy-seventh.
Trefilov var þekktur fyrir að fara langt yfir strikið í orðavali við leikmenn sína og var alls ekki óalgengt að hann lítillækkaði þá og særði með ummælum sínum í leikjum og á æfingum.
Gabisova var síðast með rússneska landsliðinu á EM í Danmörku í janúar sl. Hún er ekki í landsliðshópnum sem býr sig undir þátttöku á Ólympíuleikunum í Tókýó.
Trefilov hætti þjálfun rússneska landsliðsins vegna heilsubrests fyrir þremur árum.
