ÍBV batt enda á fjögurra leikja sigurgöngu Fram í kvöld í íþróttahúsi Fram er liðin mættust í 6. umferð Olísdeildar karla í handknattleik. Eyjamenn voru sterkari í síðari hálfleik og unnu með fjögura marka mun, 32:28 og komust þar með upp í þriðja sæti, alltént í bili en Haukar geta laumast upp fyrir þá ef vinni þeir HK á eftir.
Fram og Afturelding hafa einnig átta stig í fjórða og fimmta sæti.
Varnarleikur og marvarsla sat á hakanum í fyrri hálfleik en það lifnaði aðeins yfir í þeim málum í þeim síðari. ÍBV byrjaði vel og var með þriggja marka forskot um miðjan hálfleikinn áður en Fram skoraði fjögur mörk í röð og komst yfir, 13:12. Eftir það var jafnt fram að hálfleik á sama tíma og leikmönnum hljóp nokkurt kapp í kinn með þeim alfleiðingum að nokkuð var um brottrekstra.
ÍBV var marki yfir í hálfleik, 17:16 og hélt síðan tveggja til fjögurra marka forskoti síðari hálfleikinn á enda.
Mörk Fram: Vilhelm Poulsen 9/1, Þorvaldur Tryggvason 6, Þorsteinn Gauti Hjálmarsson 5, Stefán Darri Þórsson 4, Arnar Snær Magnússon 2, Kristinn Hrannar Bjarkason 2.
Varin skot: Lárus Helgi Ólafsson 8, 24,2% – Valtýr Már Hákonarson 2, 22,2%.
Mörk ÍBV: Dagur Arnarsson 7, Sigtryggur Daði Rúnarsson 7, Rúnar Kárason 7, Kári Kristján Kristjánsson 3, Ásgeir Snær Vignisson 2, Sveinn Jose Rivera 2, Andrés Marel Sigurðsson 1, Theodór Sigurbjörnsson 1, Róbert Sigurðarson 1.
Varin skot: Björn Viðar Björnsson 8, 38,1%,
Öll tölfræði leiksins er hjá HBStatz.
Stöðuna og næstu leiki í Olísdeild karla má sjá hér.
