Handknattleiksdeild ÍBV hefur gert samkomulag við færeyska handknattleiksmanninn Dánjal Ragnarsson um að leik með ÍBV næstu þrjú ár frá og með næsta keppnistímabili.
Dánjal er fæddur árið 2001, er rétthent skytta og 194 cm á hæð og er fæddur og uppalinn í Þórshöfn. Hann leikur með Neistanum, sem Arnar Gunnarsson þjálfar, og hefur gert frá 6 ára aldri. Í byrjun yfirstandandi tímabils færði Dánjal sig um set og lék með U-19 ára liði Skanderborg í Danmörku. Vegna vandræða í kringum Covid-19 er hann kominn aftur til baka í uppeldisfélagið.
Dánjal hefur leikið með öllum yngri landsliðum Færeyja (U15, U16, U18 og U20) og er lið hans Neistin nú á leiðinni í undanúrslit um Færeyjameistaratitilinn.
Sex færeyskir handknattleiksmenn leika á yfirstandandi leiktíð með liðum í Olísdeild karla og kvenna.
Handbolti.is fékk góðfúslegt leyfi til að birta þetta myndskeið þar sem Dánjal er í leik með Neistanum og skorar nokkur mörk.
