Fá meira fyrir gull á HM en HSÍ fékk úr Afrekssjóði

Alfreð Gíslason, landsliðsþjálfari Þýskalands í handknattleik karla. Mynd/DHB

Ef þýska landsliðið, undir stjórn Alfreðs Gíslasonar, vinnur heimsmeistaratitilinn á HM í Egyptalandi í lok þessa mánaðar þá skiptir landsliðshópurinn að meðtöldu starfsfólki á milli sín 500.000 evrum, eða jafnvirði 78 milljóna króna. Þess má geta til samanburðar að á dögunum fékk Handknattleikssamband Íslands hæsta styrk úr Afrekssjóði ÍSÍ, 71,6 milljónir króna.

Hafni þýska landsliðið í öðru sæti kemur í hlut þess 380.000 evrur, um 59 milljónir króna og fyrir þriðja sæti fær hópurinn 260.000 evrur til skiptanna, eða um 40 milljónir króna. Ef Þjóðverjar komast í bronsleikinn en tapa honum þá verða 140.000 evrum skipt bróðurlega á milli manna, um 22 milljónir króna.
Eftir því sem sport1.de segir mun Alfreð Gíslason landsliðsþjálfari ekki vera í þeim hópi sem skiptir fyrrgreindum peningum á milli sín ef til kemur. Um hann eins og fyrri landsliðsþjálfara gildir sérsamningur um laun og aukagreiðslur.

- Auglýsing -

Nýjustu fréttir

- Auglýsing -