Fékk grænt ljós hjá lækni og mætti til leiks

Lið Guif leiktíðina 2020/2021. Daníel Freyr Andrésson er í miðri neðstu röðinni í peysu númer 16. Mynd/Guif

Daníel Freyr Andrésson mætti til leiks á ný í liði Guif í kvöld þegar það mætti Redbergslid í sænsku úrvalsdeildinni í handknattleik á heimavelli. Hann fékk högg á annað augað í kappleik undir lok október og var frá keppni um tíma og tók m.a. ekki þátt í kappleik í síðustu viku. Eftir að hafa fengið grænt ljós frá lækni fyrir helgina stóð Daníel Freyr á milli stanganna í kvöld. Þótt hann hafi átt góðan leik dugði það ekki til því Guif tapaði með eins marks mun, 32:31.

Daníel Freyr varði 15 skot og var með 36% hlutfallsmarkvörslu. Einnig skoraði hann eitt mark.

Það var einkum slæmur fyrri hálfleikur sem kom leikmönnum Guif í koll þegar upp var staðið. Þeir voru fimm mörkum undir að honum loknum, 17:12. Guif hefur ekki vegnað sem best á heimavelli á leiktíðinni. Liðið er nú í 8. sæti með 10 stig eftir 12 leiki og er sex stigum á eftir toppliði IFK Kristianstad sem hefur leikið tveimur leikjum færra.

Nýir samherja Bjarna í þriðja sæti

Skövde, sem Bjarni Ófeigur Valdimarsson samdi við um helgina, vann Lugi á heimavelli í kvöld, 32:24. Skvöde er í þriðja sæti með 15 stig eftir 11 leiki og er stigi á eftir Kristianstad og Malmö. Síðarnefnda liðið hefur leikið einu sinni oftar en Kristianstad. Alingsås og Ystad IF eru með 15 stig eins og Skövde en eiga leik til góða.

- Auglýsing -

Nýjustu fréttir

- Auglýsing -