Harpa Valey Gylfadóttir, númer sex, fyrir miðri mynd, í leiknum í kvöld. Mynd/EHF

Ýmislegt getur komið fyrir á handknattleiksvellinum en það sem henti Hörpu Valey Gylfadóttur, landsliðskonu, í kvöld eftir ríflega tíu mínútur í síðari í hálfleik er sem betur fer ekki algengt. Hún fékk hefti úr heftibyssu á kaf í lófann og varð skiljanlega að fara af leikvelli þar sem heftið var fjarlægt, sárið hreinsað og búið eins vel um það og kostur var á. Að því loknu mætti Eyjamærin galvösk til leiks og lék það sem eftir var leiksins.


Skýringin á að heftið endaði í lófa Hörpu Valeyjar er sennilega sú að fyrir leikinn voru borðar meðfram leikvellinum festir upp með heftum sem skotið var úr heftibyssu. Fyrir kæruleysi starfsmanna hefur hefti hrokkið á keppnisgólfið, límst utan á boltann og borist af honum í lófann á Hörpu Valeyju.

Lovísa Thompson t.h. í leiknum í kvöld. Mynd/EHF

Blæddi úr Lovísu

Þetta var ekki eina óhappið sem henti leikmenn íslenska liðsins því rétt áður fékk Lovísa Thompson högg á hægra augabrún með þeim afleiðingum að það sprakk fyrir. Fór hún af leikvelli strax þar sem Tinna Jökulsdóttir, sjúkraþjálfari, og læknir sænska landsliðsins stöðvuðu blæðinguna, hreinsuðu sárið og lokuðu því.

- Auglýsing -

Nýjustu fréttir

- Auglýsing -