„Fékk tennurnar á Darra óheppilega í gegnum nösina“

Nökkvi Dan Elliðason, leikmaður Selfoss, á fullri ferð í leik við Þór á dögunum. Mynd/Selfoss/SÁ

Betur fór en talið var í fyrstu hjá handknattleiksmanni Selfoss-liðsins, Nökkva Dan Elliðasyni, þegar hann rakst á Darra Aronsson í fyrri hálfleik í viðureign Hauka og Selfoss í Olísdeild karla í Schenkerhöllinni á föstudagskvöld.


Við áreksturinn opnaðist sár á nefi Nökkva Dans svo að það blæddi hressilega úr og varð að gera nokkurt hlé á leiknum meðan honum var komið til aðstoðar auk þess sem þrífa þurfti gólfið á eftir.


Nökkvi Dan sagði við handbolta.is í gær að hann hafi sloppið við nefbrot þrátt fyrir höggið hafi verið nokkurt.


„Ég slapp óbrotinn en skellti mér í saumavélina upp á slysó. Ég fékk tennurnar á Darra óheppilega í gegnum nösina og þurfti aðeins að púsla því saman. Ekkert alvarlegra en smá minningarör,“ sagði Nökkvi Dan hress í bragði.


Ómögulegt er að segja um hvort Nökkvi verði klár í slaginn gegn Gróttu í Hleðsluhöllinni á Selfossi annað kvöld.

- Auglýsing -

Nýjustu fréttir

- Auglýsing -