Handknattleiksdeild Hauka hefur gert samning við Önnu Láru Davíðsdóttur til næstu tveggja ára. Anna Lára, sem verður 21 árs á þessu ári, kemur til liðs við Hauka frá Gróttu þar sem hún hefur leikið undanfarin ár. Hún lék 16 leiki í með Gróttu í Grill66-deildinni á leiktíðinni og skoraði 34 mörk.
„Anna Lára getur leyst af allar stöðurnar fyrir utan og gefur hún liðinu því meiri möguleika þar sem hún getur leyst báðar skyttustöðunar ásamt því að vera leikstjórnandi,“ segir í tilkynningu handknattleiksdeildar Hauka vegna komu Önnu Láru.
„Anna Lára er ungur og mjög spennandi leikmaður, með mikinn metnað og vill fara lengra. Frábært að hún velji Hauka og það umhverfi sem við erum að bjóða upp á til að taka það skref. Anna Lára les leikinn vel, áræðin og útsjónarsöm og á eftir að styrkja liðið og gefa okkur aukna breidd,“ er haft eftir Gunnari Gunnarssyni þjálfara Hauka í fyrrgreindri tilkynningu.
