- Auglýsing -
Tjörvi Þorgeirsson einn reyndasti leikmaður Hauka og nýráðinn aðstoðarþjálfari karlaliðs félagsins fer í aðgerð á hné í sumar. Hann hefur glímt við þrálát meiðsli í öðru hné. Rúnar Sigtryggsson, nýráðinn þjálfari Hauka, sagði í gær í samtali við Stöð2 að sumarið fari í aðgerð og endurhæfingu hjá Tjörva.
„Ef hún gengur vel þá spilar hann vonandi meira en ef ekki þá er hann allavega kominn með hlutverk,“ sagði Rúnar í fyrrgreindu samtali við Stöð2 um Tjörva sem verður hægri hönd Rúnars við þjálfun Haukaliðsins.
Ljóst er að einhver uppstokkun mun eiga sér stað hjá Haukum sem hefur verið sigursælasta handknattleikslið landsins á þessari öld.
Dregur saman seglin
Margt bendir til þess að Heimir Óli Heimisson, einn reynslumesti leikmaður Hauka dragi saman seglin. Hann sagði við Stöð2sport eftir síðasta leik ÍBV og Hauka í undanúrslitum Íslandsmótsins að hugsanlega hafi hann leikið sinn síðasta leik með liðinu.
Aron Rafn Eðvarðsson, markvörður Hauka, er í óvissu eftir að hafa orðið fyrir þriðja heilahristingnum á ferlinum í vetur.
- Auglýsing -
