- Auglýsing -
Handknattleikskonan Ída Margrét Stefánsdóttir hefur ákveðið að snúa til baka til Gróttu en hún lék nokkra leiki með liðinu snemma árs eftir að lánasamningur var gerður á milli hennar og Vals. Ída Margrét hefur nú skrifað undir eins árs samning við Gróttu en annars er hún félagsbundin Val.
Ída Margrét er 20 ára gömul og leikur sem vinstri skytta. Hún hefur bæði leikið í Grill 66-deild kvenna með Val U og í Olísdeildinni með Val á síðustu tímabili. Ída Margrét var á láni í Gróttu í byrjun þessa árs en staldraði stutt við þar sem hún var kölluð til baka til Vals. Ída Margrét náði þó að leika fimm leiki og skora í þeim 24 mörk.
„Ída er öflugur sóknarleikmaður en er líka frábær varnarmaður. Hún var valin besti varnarmaður Grill 66-deildarinnar tímabilið 2020-2021,“ segir m.a. í tilkynningu frá handknattleiksdeild Gróttu.
Grótta leikur áfram í Grill66-deildinni á næstu leiktíð. Gunnar Gunnarsson tók nýverið við þjálfun kvennaliðs Gróttu.
- Auglýsing -
