Brynjar Hólm Grétarsson hefur framlengt samning sinn við Stjörnuna til ársins 2024. Hann kom til Garðabæjarliðsins á síðasta ári frá Þór. Brynjar Hólm er lék áður með Akureyri handboltafélagi og síðan Þór eftir að upp úr samstarfi KA og Þórs slitnaði um útgerðina á Akureyri handboltafélagi.
Brynjar Hólm er nýútskrifaður með Bs. í viðskiptafræði og þjálfar 3. flokk karla, ásamt því að æfa og spila með Stjörnunni í handbolta, segir í tilkynningu Stjörnunnar.
„Brynjar Hólm er mjög fjölhæfur leikmaður sem getur spilað margar stöður bæði í vörn og sókn. Þrátt fyrir að vera um 2 metrar á hæð hefur hann mikla snerpu og er ég sannfærður um að hann eigi eftir að ná langt í handboltanum. Ég sem þjálfari er mjög ánægður að fá að vinna með svona öflugum leikmanni sem hefur allt til þess að ná á toppinn. Hans karakter er til fyrirmyndar, mikill liðsmaður sem við Stjörnumenn erum stoltir að hafa í okkar liði,“ er haft eftir Patreki Jóhannessyni, þjálfara karlaliðs Stjörnunnar í tilkynningu á Facebook-síðu handknattleiksdeildar Stjörnunnar.
