Fögnuðu í fimm mínútur – voru svo rændir sigri

Bjarni Ófeigur Valdimarsson leikmaður Skövde t.v. Mynd/Aðsend

Bjarni Ófeigur Valdimarsson og félagar í IFK Skövde voru rændir sigri í fjórðu viðureign sinni við Ystad í úrslitum um sænska meistaratitilinn á síðasta föstudag. Þeir höfðu fagnað sigri í leiknum í nærri fimm mínútur þegar sigurmarkið var afturkallað af dómurunum eftir talsverða rekistefnu dómara og starfsmanna á ritaborðinu.


Leikurinn var framlengdur og lauk með sigri Ystad, 47:46, eftir tvær framlengingar og skotkeppni sem Ystad vann og fagnaði meistaratitlinum. Skövde-liðið hefur jafnað metin í einvíginu með sigri í leiknum og knúið fram oddaleik um meistaratitilinn á heimavelli.

Kæru vísað frá

Forráðamenn Skövde kærðu framkvæmd leiksins en kærunni var umsviflaust vísað frá án þess að vera efnislega tekin fyrir. Heit umræða hefur verið um atvikið eins og gefur að skilja.

Ekkert VAR

Ekkert VAR-kerfi var á leiknum og þar af leiðandi var ekki hægt að fá úr því skorið með óyggjandi hætti af sjónvarpsupptöku að markið hafi verið skorað eftir að leiktíminn rann út.

Héldu að tíminn hafi verið búinn

Bjarni Ófeigur sagði við handbolta.is í dag að eftir að markið var skorað og dæmt gilt hafi starfsmenn á ritarborðinu, en þar var m.a. fyrrverandi stjórnandi Ystad til margra ára, lesið dómurunum pistilinn. Sá hafði sig mest í frammi. Þeim lestri lauk með að markið var afturkallað vegna þess að menn héldu að leiktíminn hafi verið úti þegar markið var skorað.


„Við vorum búnir að fagna í fimm mínútur þegar þeir blása markið af. Þetta var ömurlegt,“ sagði Bjarni Ófeigur.

- Auglýsing -

Nýjustu fréttir

- Auglýsing -