Forseti sýnir forseta bláa spjaldð með skýrslu

Hesham Nasr, forseti egypska handknattleikssambandsins hefur verið útilokaður frá störfum fyrir handknattleikshreyfinguna. Mynd/EPA

Óhætt er að segja að Hassan Moustafa, forseti Alþjóða handknattleikssambandsins, IHF, hafi sýnt landa sínum, Hesham Nasr, bæði rauða og bláa spjaldið með skýrslu í óeiginlegri merkingu í vikunni. Nasr, sem hefur verið forseti egypska handknattleikssambandsins um nokkurt skeið, var á dögunum útilokaður, og það með skýrslu, frá öllum störfum sem við kemur handknattleik.


Nasr þverbraut hvað eftir annað sóttvarnareglur meðan á heimsmeistaramótinu í handknattleik karla stóð í janúar. M.a. valsaði hann á milli sóttvarnahólfa, vitanlega þvert á reglur, og beit höfuðið af skömminni með því að skella ítrekað skollaeyrum við athugsemdum og síðar áminningum vegna brota á reglum. Að mati IHF á Nasr sér engar málsbætur. Ítrekað sást til hans á sjónvarpsupptökum vaða um allt í keppnishöllum, draga að áhorfendur og virða að vettugi sóttvarnareglur.


Moustafa og meðreiðarsveinar hans í stjórn IHF tóku framkomu Nasr fyrir á fundi í vikunni þar sem fyrir lá greinargerð um brot hans á sóttvarnareglum HM. Voru Moustafa og félagar á einu máli um að Nasr skuli sæta banni frá störfum tengdum handknattleik alltént fram að næsta þingi IHF sem verður síðla á þessu ári. Þar verður mál hans væntanlega tekið upp að nýju.

- Auglýsing -

Nýjustu fréttir

- Auglýsing -