Frá Fram til Lugi

Hafdís Renötudóttir, markvörður, stendur í marki Fram á næsta keppnistímabili. Mynd/Facebook-síða Fram

Hafdís Renötudóttir, markvörður Fram og íslenska landsliðsins, hefur ákveðið á að ganga nú þegar til liðs við sænska liðið Lugi HF í Lundi. Fram hefur samþykkt félagsskiptin. Hafdís þekkir vel til sænska handboltans eftir að hafa leikið með Boden keppnistímabilið 2018/2019.

Frá þessu var greint á Facebook-síðu handknattleiksdeildar Fram í morgunsárið.

Hafdís hefur ekkert leikið með Fram til þessa í keppnistímabilinu. Hún hlaut höfuðhögg, oftar en einu sinni, á æfingum í sumar og í haust hefur verið að jafna sig af þeim.

Hafdís, sem er 23 ára gömul, kom ung inn í lið Fram. Hún lék með Stjörnunni leiktíðina 2016/2017 en fór eftir það til SönderjyskE í Danmörku í eitt ár og var annað ár hjá Boden í Svíþjóð. Eftir tveggja ára veru ytra flutti Hafdís heim á ný síðsumars 2019. Hún hafði reyndar samið við pólskt félagslið þá um sumarið en rifti samningi sínum eftir skamma veru.

Hafdís hefur verið í herbúðum Fram síðasta árið og varð bikarmeistari og deildarmeistari með liðinu í vor áður en keppni í handbolta var slaufað vegna kórónuveirunnar.

Hafdís hefur leikið 26 A-landsleiki og skorað eitt mark.

Lugi HF rekur lestina án stiga af 12 liðum í sænsku úrvalsdeildinni þegar tveimur umferðum er lokið.

Katrín Ósk Magnúsdóttir og Ástrós Anna Bender munu því standa vaktina í marki Fram á leiktíðinni en sú síðarnefnda kom til liðsins í byrjun tímabilsins.

- Auglýsing -

Nýjustu fréttir

- Auglýsing -