Aron Pálmarsson verður frá keppni um nokkra vikna skeið. Mynd/EPA

Aron Pálmarsson leikur ekki með Danmerkurmeisturum Aalborg Håndbold næstu þrjár til sex vikur eftir því sem Jan Larsen framkvæmdstjóri félagsins greinir Nordjyske.dk frá í dag. Aron meiddist eftir 20 mínútur eða svo í leik Aalborg og Ringsted í dönsku úrvalsdeildinni í gærkvöld eins og handbolta.is greindi frá í morgun.


Eftir ómskoðun í dag lítur út fyrir að meiðslin séu tognun eða trosnun í vöðva í nára. Larsen segir erfitt að fullyrða hversu lengi Hafnfirðingurinn verður frá keppni en telur samkvæmt sjúkraþjálfara Álaborgarliðsins að um verði að ræða þriggja til sex vikna fjarveru frá vellinum.


Framundan er þétt dagskrá hjá Danmerkurmeisturunum, jafnt heima fyrir og í Meistaradeild Evrópu en keppni í henni hefst um miðja næstu viku.


„Þetta er vissulega hundfúlt þar sem það hefur tekið okkur drjúgan tíma að spila menn saman og útlitið virtist gott. Meiðsli eru hinsvegar óhjákvæmilegur fylgifiskur íþrótta og við erum með breiðan leikmannhóp. Það er mikið áfall fyrir okkur að missa Aron úr hópnum um skeið,“ segir Larsen við Nordjyske.dk í dag.

- Auglýsing -

Nýjustu fréttir

- Auglýsing -