Alexander Petersson er sagður á leið til MT Melsungen. Mynd/EPA

Handknattleiksmaður Alexander Petersson leikur ekki með liði sínu, Rhein-Neckar Löwen, á næstunni. Alexander meiddist í leik gegn Leipzig um síðustu helgi.

Rifa er í festingum þríhöfða upphandleggs upp við vinstri öxl. Alexander staðfesti í skilaboðum til handbolta.is í dag að reiknað sé með að hann verði frá keppni í þrjár til fjórar vikur af þessum sökum.

Rhein-Neckar Löwen mætir Erlangen á heimavelli á sunnudaginn. Engum áhorfendum verður hleypt inn í íþróttahöllina í Mannheim til þess að fylgjast með leiknum en sú hefur verið raunin í heimaleikjum Löwen á þessu keppnistímabili.

Rhein-Neckar Löwen hefur unnið þrjá leiki en tapað einum í fyrstu fjórum umferðum þýsku 1. deildarinnar.

Löwen átti að leika gegn Trimo Trebnje í fyrstu umferð Evrópudeildarinnar á þriðjudagkvöldið síðasta. Viðureigninni var frestað vegna kórónuveirunnar. Sömu sögu er að segja af næsta leik Löwen í keppninni gegn Tatabanya frá Ungverjalandi. Leikmenn Tatabanya eru upp til hópa með kórónuveiruna og hafa af þeim sökum öðrum hnöppum að hneppa um þessar mundir en að leika handknattleik.

- Auglýsing -

Nýjustu fréttir

- Auglýsing -