Handknattleikskonan Katrín Tinna Jensdóttir hefur gengið til liðs við norska B-deildarliðið Volda. Þetta kemur fram á heimasíðu félagsins í dag.
Katrín Tinna er 19 ára gömul og hefur undanfarin tvö ár leikið með Stjörnunni í Olísdeildinni. Hún var áður í herbúðum Fylkis hvaðan þjálfarinn Halldór Stefán Haraldsson kom til Volda fyrir fimm árum. Einnig er Fylkir uppeldisfélag Theu Imani Sturludóttur landsliðskonu og leikmanns Vals en hún lék um tveggja ára skeið með Volda undir stjórn Halldórs Stefáns.
Auk Halldórs Stefáns er Hilmar Guðlaugsson í þjálfarahópi Volda sem sat eftir í B-deildinni þegar keppni var hætt í norskum handknattleik snemma árs. Volda var þá í toppbaráttu.
Katrín Tinna hefur leikið með yngri landsliðum Íslands. Hún leikur á línunni.
