Frábær tilfinning að komast aftur út á völlinn

Andrea Jacobsen handknattleikskona hjá Kristianstad í Svíþjóð. Mynd/Kristianstad Handboll

„Það var frábær tilfinning að koma aftur út á völlinn. Eftir brjálað púl í rúmt ár var ótrúleg gott að koma inn og hjálpa liðinu í þessum úrslitaleik um fimmta sætið,“ sagði Andrea Jacobsen, handknattleikskona hjá sænska úrvalsdeildarliðinu Kristianstad við handbolta.is í morgun.


Eins og handbolti.is greindi frá í gærkvöld þá lék Andrea sinn fyrsta leik í gærkvöld með liði sínu eftir 13 mánaða fjarveru. Hún sleit krossband í febrúar á síðasta ári.


„Ég er alveg verkjalaus en kannski örlítið þreytt i hnéinu eftir leikinn,“ sagði Andrea spurð hvernig heilsan væri í morgun eftir fyrsta leik. Andrea skoraði þrjú mörk í fimm skotum í gær í tíu marka sigri á Önnereds.


„Við fengum helgarfrí í verðlaun fyrir að vinna leikinn þannig það fer í að hvíla sig og taka endurheimtar æfingu til að vera klár í leikinn á móti Skuru á þriðjudaginn,“ sagði Andrea ennfremur. Leikurinn við Skuru, sem er í efsta sæti sænsku úrvalsdeildarinnar verður í Kristianstad á þriðjudagskvöld. Það er jafnframt síðasti leikur liðanna í deildarkeppninni. Úrslitakeppnin hefst undir næstu mánaðarmót.

- Auglýsing -

Nýjustu fréttir

- Auglýsing -