Landsliðsmarkvörðurinn Viktor Gísli Hallgrímsson er einn fimm markvarða sem átti bestu tilþrifin í fyrri umferð 16-liða úrslita Evrópudeildarinnar í handknattleik sem fram fór í síðustu viku. Viktor Gísli varði þá glæsilega opið færi í leik með danska liðinu GOG gegn CSKA Moskvu. GOG vann leikinn, 33:31.
Handknattleikssamband Evrópu tók saman fimm bestu tilþrif markvarða í umferðinni og er þau að finna hér fyrir neðan. Varsla Viktors Gísla er fyrst í syrpunni.
Síðari leikir 16-liða úrslita keppninnar fara fram annað kvöld. Einn leikur fyrri umferðar verður í kvöld þegar Íslendingaliðið IFK Kristianstad tekur á móti Ademar León á heimavelli. Leiknum varð að fresta í síðustu viku vegna kórónuveirusmita í herbúðum spænska liðsins. Liðin mætast þar af leiðandi í kvöld og annað kvöld í Kristianstad.
