Frækinn sigur hjá Arnóri og félögum

Stefan Madsen þjálfari Aalborg og nánasti samstarfsmaður Arnórs Atlasonar aðstoðarþjálfara. Mynd/EPA

Arnór Atlason og félagar hans í danska meistaraliðinu Aalborg standa vel að vígi eftir fimm marka sigur á Flensburg í fyrri viðureign liðanna í 8-liða úrslitum Meistaradeildar Evrópu í handknattleik í kvöld. Leikið var í Álaborg og hafði heimaliðið þriggja marka forskot að loknum fyrri hálfleik, 13:10. Um var að ræða fyrsta leik Aalborg í 8-liða úrslitum í sögu Meistaradeildarinnar.

Síðari leikurinn fer fram hinum megin við dönsku landamærin á miðvikudaginn. Arnór er aðstoðarþjálfari Aalborg og Aron Pálmarsson verður einn liðsmanna frá og með sumrinu.


Aalborg-liðið gaf tóninn í upphafi leiks með því að skora þrjú fyrstu mörkin áður en danski landsliðsmaðurinn Lasse Svan kom Flensburg á bragðið. Sænski landsliðsmarkvörðurinn Mikael Aggefors átti stórleik í marki Aalborg.


Flensburg jafnaði metin snemma í síðari hálfleik, 16:16. Í framhaldinu skoraði Aalborg tvö mörk og lét forystuna aldrei af hendi eftir það.


Fleix Claar og Lukas Sandell skoruðu átta mörk hvor fyrir Aalborg og voru markahæstir. Jim Gottfridsson var markahæstur hjá Flensburg með fimm mörk og Daninn Mads Mensah var næstur með fjögur. Alexander Petersson lék með Flensburg en skoraði ekki mark.

Nantes frá Frakklandi lagði ungverska meistaraliðið Veszprém, 32:28, í Nantes í kvöld í síðasta leik fyrri umferðar 8-liða úrslita Meistaradeildarinnar. Emil Nielsen, markvörður Nantes átti enn einn stórleikinn. Hann varði 15 skot og var með 36% hlutfallsmarkvörslu. Valero Rivera skoraði sjö mörk fyrir Nantes. Kiril Lazarov var einn fjögurra leikmanna liðsins með fjögur mörk.

Casper Marguc var markahæstur hjá Veszprém með átta mörk. Andreas Nilsson og Petar Nenadic skoruðu sex mörk hvor.

- Auglýsing -

Nýjustu fréttir

- Auglýsing -