Þorgrímur Smári Ólafsson sækir á vörn KA í vetur. Mynd/Egill Bjarni Friðjónsson.

Framarar bundu í kvöld enda á sigurgöngu Selfoss-liðsins í Olísdeild karla í handknattleik með vasklegri frammistöðu á heimavelli í níundu umferð deildarinnar. Lokatölur, 27:25, fyrir Fram sem er í sjöunda sæti með 9 stig eftir jafn marga leiki. Tapið kom hinsvegar í veg fyrir að Selfoss-liðinu tækist að komast í toppsætið. Selfoss situr í þriðja til fjórða sæti með 11 stig eins og FH.


Staðan var jöfn að loknum fyrri hálfleik, 12:12. Viðureignin var í járnum lengi vel í síðari hálfleik en þegar komið var fram yfir síðari hluta hálfleiksins komst Fram-liðið yfir og gaf aldrei færi á sér eftir það. Varnarleikur liðsins var betri en gegn Haukum fyrir viku og skipti það miklu máli þegar upp var staðið.


Þorgrímur Smári Ólafsson átti prýðilegan leik fyrir Fram. Auk þess að skora sex mörk átti hann þátt í sjö mörkum til viðbótar auk þess sem hann lét til sín taka í vörninni.


Mörk Fram: Þorgrímur Smári Ólafsson 6, Kristinn Hrannar Elísberg Bjarkason 5, Sigurður Örn Þorsteinsson 4, Vilhelm Poulsen 4, Stefán Darri Þórsson 3, Þorvaldur Tryggvason 2, Rógvi Dal Christiansen 2, Andri Már Rúnarsson 1.
Mörk Selfoss: Atli Ævar Ingólfsson 5, Sveinn Aron Sveinsson 5, Einar Sverrisson 4, Guðmundur Hólmar Helgason 3, Ragnar Jóhannsson 3, Tryggvi Þórisson 3, Hergeir Grímsson 1, Nökkvi Dan Elliðason 1.

- Auglýsing -

Nýjustu fréttir

- Auglýsing -