Sara Dögg Hjaltadóttir í leik með Gjerpen HK Skien. Mynd/aðsend

Sara Dögg Hjaltadóttir og samherjar hennar í Gjerpen HK Skien byrja vel í norsku 1. deildinni í handknattleik. Að loknum fjórum leikjum er liðið í efsta sæti deildarinnar með fullt hús stiga, átta. Síðast í dag vann Gjerpen öruggan sigur á Reistad á heimavelli, 35:17. Mikill munur var á liðunum sem sést best á því eftir fyrri hálfleik var staðan 21:3.

Sara Dögg var næst markahæst hjá Gjerpen í dag. Hún skoraði fimm mörk, þar af tvö úr vítaköstum. Sara Dögg gekk til liðs við Gjerpen HK Skien í sumar eftir að leikið með öðru liði í norsku 1. deildinni, Volda. Sara Dögg var á dögunum valin í B-landsliðið sem kemur saman til æfinga hér á landi á næstu dögum undir stjórn Hrafnhildar Óskar Skúladóttur og Önnu Úrsúlu Guðmundsdóttur.


Volda gerði jafntefli við Charlottenlund SK, 26:26, í hörkuleik á heimavelli Charlottenlund í Þrándheimi í dag.  Charlottenlund tapaði sínu fyrsta stigi á leiktíðinni og er í öðru sæti á eftir Gjerpen.  Unglingalandsliðskonan, Katrín Tinna Jensdóttir, sem gekk til liðs við Volda í sumar, skoraði ekki mark í leiknum.

Halldór Stefán Haraldsson þjálfar lið Volda sem er í 5. sæti með fjögur stig eftir þrjá leiki. Liðið á semsagt inni leik á þau sem eru fyrir ofan.

- Auglýsing -

Nýjustu fréttir

- Auglýsing -