Arnór Þór Gunnarsson, sem var fyrirliði íslenska landsliðsins í handknattleik á HM í upphafi þessar árs, hefur ákveðið að hætta að leika með íslenska landsliðinu í handknattleik. Hann greindi frá ákvörðun sinni í samtali við Akureyri.net í dag.
Þolir ekki álagið
„Ástæða þess að ég hef ákveðið að hætta er að álagið sem fylgir því að spila bæði með félagsliði og landsliði er einfaldlega of mikið; ég er með brjóskeyðingu í hægri mjöðm og mjöðmin þolir ekki að ég leiki á tveggja eða þriggja daga fresti eins og landsliðið gerir á stórmóti eins og EM,“ sagði Arnór Þór við Akureyri.net í dag.
Aðeins ef í harðbakkann slær
Arnór Þór er í 35 manna landsliðshópi Guðmundar Þórðar Guðmundssonar landsliðsþjálfara sem kynntur var í gær fyrir Evrópumótið í Ungverjalandi og Slóvakíu janúar. Þrátt fyrir að vera á listanum segist Arnór ekki verða með nema ef í harðbakkann slær og aðrir hægri hornamenn sem eru á listanum hrökkvi allir úr skaftinu.
„HSÍ spurði svo núna hvort ég væri tilbúinn að vera á 35 manna listanum og ég samþykkti það; ef svo ólíklega vildi til að allir hinir þrír hægri hornamennirnir meiddust eða heltust einhverra hluta vegna úr lestinni í miðju móti þá gæti ég hjálpað til, en gef að öðru leyti ekki kost á mér fyrir mótið,“ sagi Arnór Þór við Akureyri.net.
Þarf að sinna vinnunni
„Ég er orðinn 34 ára, á eftir eitt og hálft ár af atvinnumannssamningi hér í Þýskalandi og verð að hugsa um að geta sinnt vinnunni sem best. Skrokkurinn þolir ekki að spila bæði á fullu með félagsliðinu og landsliðinu,” sagði Arnór Þór sem hefur leikið í áratug með Bergischer og með íslenska landsliðinu í nærri 15 ár. Landsleikirnir eru 120 og mörkin 341.
Síðasta stórmót Arnórs Þórs var HM í Egyptalandi í byrjun þess ár þar sem hann var fyrirliði íslenska landsliðsins.
Allt viðtalið við Arnór Þór á Akureyri.net má nálgast hér.
