Gaman að vera hluti af þessum hóp

Karen Knútsdóttir í hörðum slag í kvöld. Mynd/EHF

„Þótt sex mörkum hafi munað þegar upp var staðið þá munaði mjög litlu að við hefðum verið í jöfnum leik. Okkur vantaði betri seinni bylgju til þess að jafna metin,” sagði Karen Knútsdóttir í samtali við handbolta.is eftir sex marka tap fyrir Serbum í síðustu umferð undankeppni Evrópumótsins. Tapið slökkti vonir íslenska landsliðsins á sæti á EM enda er riðlakeppninni lokið.


„Ég held að ef okkur tekst að ná upp betri seinni bylgju hraðaupphlaupum í liðinu þá getum við nálgast enn meira þjóðir eins og Serba. Það má segja að betri seinni bylgju er það eina sem okkur vantar,” sagði Karen ennfremur.


„Við áttum möguleika en fórum illa með tækifæri sem gáfust til þess að komast nærri þeim í síðari hálfleik. Leikurinn var hinsvegar mjög kaflaskiptur, tveir mjög ólíkir hálfleikar með sóknarleik í þeim fyrri og varnarleik í þeim síðari. Það hefði þurft lítið til þess að leikurinn hefði verið jafnari,” sagði Karen ennfremur sem kom inn í liðið fyrir leikina við Svíþjóð og Serbíu.


„Framfarir liðsins hafa verið miklar og nú eigum við orðið tvo leikmenn í allar stöður. Mitt mat er að það séu góðir tímar framundan. Liðsheildin er frábær. Það er gaman að vera hluti af þessu. Ég held að framhaldið getið orðið gott,” sagði hin leikreynda Karen Knútsdóttir í samtali við handbolta.is eftir leikinn í kvöld.

- Auglýsing -

Nýjustu fréttir

- Auglýsing -