Forráðamönnum franska handknattleiksliðsins Nantes hefur verið settur stóllinn fyrir dyrnar af sóttvarnaryfirvöldum í Pays de la Loire-héraði og gert að taka við verulega færri áhorfendum á heimaleikjum liðsins á næstu vikum. Ástæðan er sú að kórónuveirunni hefur vaxið fiskur um hrygg víða í Frakklandi á undanförnum vikum.
Mörgum hefur komið spánskt fyrir sjónir að Nantes hefur óhikað selt nærri 5.000 miða á hvern heimaleik liðsins, bæði í Meistaradeild Evrópu og í frönsku deildinni þrátt fyrir að kórónuveiran hafi kraumað í nágrenni við borgina eins og víðast hvar annars staðar í Frakklandi. Reyndar hafa reglur um hámarksfjölda áhorfenda á íþróttaviðburðum ekki verið eins strangar víða í Frakklandi og í flestum ríkjum Evrópu. Hinsvegar hafa margir gert athugasemdir við að Nantes hefur ítrekað fyllt keppninshöll sína á kappleik eftir kappleik en höllin rúmar tæplega 5.000 áhorfendur. Á sama tíma hafa lið fengið heimaleikjum sínum frestað til að hindra að leikirnir verði vettvangur hópsmita. Á það m.a. við PAUC sem Kristján Örn Kristjánsson, Donni, leikur með. Tveimur heimaleikjum PAUC hefur verið frestað á síðustu vikum vegna aukningar í smitum kórónuveiru.
Nú verða mörkin hjá Nantes færð niður í 1.000 áhorfendur og hefur félagið gert ráðstafanir til að endurgreiða aðgöngumiða sem þegar voru seldir á næsta heimaleik gegn Tremblay á sunnudaginn. Í millitiðinni leikur Nantes á útivelli gegn Arnóri Atlasyni og félögum í Danmerkurmeisturum Aalborg Håndbold í Meistaradeild Evrópu annað kvöld. Sú viðureign fer fram í Álaborg þar sem heimilt verður að hleypa 500 áhorfendum inn í Gigantium íþróttahöllina í Álaborg.
