„Þetta var talsvert líkara okkar hefðubundnu spilamennsku í dag. Við spiluðum hörku vörn allan tímann og fengum góða vörslu. Við getum allavega verið nokkuð sáttari með okkar framlag í dag en það er afar svekkjandi að hafa ekki fengið neitt út úr leiknum,“ sagði Aron Dagur Pálsson, handknattleiksmaður hjá Alingsås, eftir naumt tap, 28:27, fyrir CSKA í C-riðli Evrópudeildarinnar í handknattleik í Moskvu í dag.
Um var að ræða síðari leik liðanna á tveimur dögum í keppninni. Aron Dagur og félagar töpuðu með með átta marka mun í gær, 31:23, eftir að hafa aðeins skoraði fimm mörk gegn 16 í fyrri hálfleik.
Allt annað var upp á teningnum í dag hjá Alingsås. Viðureignin var jöfn og m.a. var jafnt í hálfleik, 14:14.
„Svo voru nokkrir svekkjandi dómar sem féllu ekki beint okkur í hag í þessum leik,“ sagði Aron Dagur ennfremur.
Aron Dagur skoraði þrjú mörk í fimm skotum og lék í þristinum, eða miðri vörninni, nær allan leikinn. Var það helsta ástæðan fyrir að honum var í tvígang vísað af leikvelli, í síðara skiptið þegar innan við þrjár mínútur voru til leiksloka.
Staðan í C-riðli Evrópudeildarinnar:
SC Magdeburg 12(7), CSKA 10(6), Montpellier 8(5), Nexe 8(8), Alingsås 4(8), Besiktas 0(8).