Grænhöfðeyingar leika til úrslita í Kaíró

Leikmenn landsliðs Grænhöfðaeyja fagna marki í eina leiknum sem þeim tókst að leika á HM 2021 í Egyptalandi. Mynd/EPA

Egyptaland og Grænhöfðaeyjar mætast í úrslitaleik Afríkukeppninnar í handknattleik karla á morgun, mánudag, í Karíó. Þetta verður í fyrsta sinn sem lið Grænhöfðaeyja leikur til úrslita í keppninni en lið eyjanna eru nú með í annað sinn í keppninni.


Landsliðs Marokkó og Túnis mætast í bronsleiknum. Gínea og Alsír eigast við í leiknum um fimmta sætið en Afríka sendir fimm lið til leiks á heimsmeistaramótið sem fram fer í Póllandi og Svíþjóð í janúar. Ljóst er að hvernig sem úrslitaleikirnir fara á morgun þá mæta landslið Egyptalands, Grænhöfðaeyja, Marokkó og Túnis til leiks á HM. Gínea og Alsír kljást um að verða fimmta liðið.


Egyptar, með sitt vaskasta lið, lenti í mesta basli á móti Túnis í undanúrslitum í gær. Þeim tókst að knýja fram sigur, 29:27, þegar upp var staðið. Túnisbúar voru marki undir í hálfleik, 17:16. Vegna meiðsla leikmanna hefur landsliðsþjálfari Túnis ekki getað stillt upp sínu sterkasta liði á mótinu.

Hafa ekki tapað leik

Landslið Grænhöfðaeyja vann Marokkó örugglega í undanúrslitum, 23:19. Grænhöfðeyingar hafa ekki tapað leik í keppninni og virðast til alls líklegir í úrslitaleiknum við Egypta.

Endasleppt á HM 2021

Grænhöfðaeyjar öðluðust keppnisrétt á HM í Egyptalandi 2021. Leikmenn, þjálfarar og aðstoðarmenn fóru illa út úr kórónuveirunni sem sló niður í æfingabúðum liðsins í Portúgal skömmu fyrir HM. Hluti leikmannahópsins ásamt aðstoðarþjálfara komst til Kaíró einkennlaus og tókst að leika einn leik á mótinu, gegn Ungverjum 34:27, áður en fleiri veiktust. Þar með urðu Grænhöfðeyingar að leggja árar í bát og draga lið sitt úr keppni.

Gæti mætt Íslandi á HM

Ef lið Grænhöfðaeyja verður Afríkumeistari tekur liðið sæti í G-riðli með Króatíu, Afríku3, og Bandaríkjum.


Hafni Grænhöfðeyingar í öðru sæti á Afríkumótinu taka þeir sæti í C-riði með Svíum, Brasilíubúum og Úrúgvæum. Það er sá riðill sem íslenska landsliðið leikur við í milliriðlum komist Íslands upp úr D-riðli. Þar með er ekki hægt að útiloka að Ísland og Grænhöfðaeyjar mætist í fyrsta sinn á handknattleiksvellinum í Svíþjóð í janúar.

Sterk tengsl um árabil

Þess má geta að lengi voru sterk tengsl á milli Íslands og Grænhöfðaeyja. Ísland veitti eyjunum þróunaraðstoð frá 1979 til 1993 og skipaði sendiherra í landinu.


Grænhöfðaeyjar eru nærri 600 km undan vesturströnd Afríku og bera nafn sitt af höfða á strönd Senegal. Á eyjunum býr um hálf milljón íbúa sem alla tíð hafa haft sterk tengsl við Portúgal enda voru eyjarnar fyrst byggðar af portúgölskum landnemum sem þangað komu að þeim óbyggðum á 15. öld. Eyjarnar urðu fljótlega miðstöð þrælaverslunar Portúgala og voru undir stjórn þeirra fram á áttunda áratug síðustu aldar þegar þeim var veitt sjálfstæði eftir fall einræðisherrans António de Oliveira Salazar sem ríkti áratugum saman í Portúgal.


Riðlaskipting HM karla 2023:

A:SpánnSvartfj.landChileÍran
B:FrakklandPóllandS-ArabíaSlóvenía
C:SvíþjóðBrasilíaAfríka2Úrúgvæ
D:ÍslandPortúgalUngv.landS-Kórea
E:ÞýskalandKatarSerbíaAfríka5
F:NoregurN-MakedóníaArgentínaHolland
G:Afríka1KróatíaAfríka3Bandaríkin
H:DanmörkBelgíaBareinAfríka4


- Auglýsing -

Nýjustu fréttir

- Auglýsing -