- Auglýsing -
- Grétar Ari Guðjónsson og félagar í Nice voru óheppnir að vinna ekki Massy Essonne á útivelli í frönsku 2. deildinni í handknattleik í gærkvöld. Leikmenn Massy náðu að jafna metin undir lokin, 27:27, eftir að Nice-liðið hafði leikið vel í síðari hálfleik og snúið við taflinu. Massy-liðið var fjórum mörkum yfir í hálfleik, 14:10.
- Grétar Ari stóð sig vel í leiknum og varði 14 skot í leiknum, ríflega 34% hlutfallsmarkvarsla. Nice er í sjötta sæti deildarinnar með 24 stig eftir 21 leiki. Massy Essonne er tveimur stigum á eftir í áttunda sæti. Ivry-liðið ber höfuð og herðar yfir önnur lið deildarinnar, hefur 40 stig, er 11 stigum á undan Pontault.
- Sænski handknattleiksþjálfarinn Per Johansson, sem stýrir rússneska meistaraliði kvenna, Rostov-Don, er kominn á hálann ís eftir að hann lýsti því yfir að hann væri óánægður með að rússneskum íþróttaliðum væri meinuð þátttaka í alþjóðlegri keppni. Hann sagði að ekki ætti að blanda saman stjórnmálum og íþróttum. Johansson fékk á baukinn frá mörgum löndum sínum á Twitter vegna þessa. Johansson tók nýverið við þjálfun hollenska kvennalandsliðsins til viðbótar við starf sitt hjá rússnesku meisturunum sem strikaðir hafa verið út úr keppni í Meistaradeildinni en liðið var komið í átta liða úrslit.
- Öllum leikjum í Austur-Evrópudeild karla í handknattleik hefur verið frestað um óákveðinn tíma enda er keppnin meira og minna í uppnámi eftir að Rússar réðust inn í Úkraínu fyrir nærri tveimur vikum. Nokkur lið geta ekki leikið um þessar mundir vegna stríðsins auk þess sem helsti styrktaraðili keppninnar er rússneska orkufyrirtækið Gazprom.
- Kórónuveiran herjar á herbúðir þýska 2. deildarliðsins í Coburg sem Tumi Steinn Rúnarsson gekk til liðs við um miðjan janúar. Af þessu sökum hefur viðureign liðsins við Elbflorenz sem fram átti að fara í Dresden í kvöld verið frestað. Um er að ræða annan leik Corburg í röð sem verður að slá á frest.
- Auglýsing -
