Grétar Ari og félagar skelltu toppliðinu á heimavelli

Grétar Ari Guðjónsson markvörður Nice. Mynd/Cavigal Nice Handball

Grétar Ari Guðjónsson stóð í marki Nice allan leikinn í kvöld þegar liðið skellti toppliði Saran, 34:29, í frönsku B-deildinni í handknattleik en leikið var í Nice. Heimamenn voru með yfirhöndina í leiknum frá upphafi til enda og höfðu m.a. þriggja marka forskot þegar gengið var til búningsherbergja að loknum fyrri hálfleik, 17:14.


Sem fyrr segir var Grétar Ari í marki Nice í leiknum frá upphafi til enda ef frá eru skilin tvö vítaköst sem kollegi hans spreytti sig á. Alls varði Grétar Ari níu skot í leiknum og var með 25% hlutfallsmarkvörslu.

„Ég er ánægðir með sigurinn en ég get alveg viðurkennt það að ég hefði viljað verja aðeins meira. Eins og leikurinn þróaðist var þetta kannski fínt. Ég ætla allavega að reyna vera ánægður með þetta en einhvern veginn vill maður samt alltaf meira,“ sagði Grétar Ari við handbolta.is eftir sigurinn í kvöld.

Nice situr í áttunda sæti deildarinnar með 12 stig að loknum 12 leikjum en leikurinn í kvöld var sá fyrsti hjá Nice á þessu ári. Saran er efst með 18 stig eins og Cherbourg sem á leik til góða á sunnudaginn við Nancy sem er í þriðja sæti með 16 stig eins og Pontault.

- Auglýsing -

Nýjustu fréttir

- Auglýsing -