Grétar Ari Guðjónsson, markvörður, hélt upp á það að vera valinn í 35 manna hópi íslenska landsliðsins fyrir Evrópumeistaramótið í handknattleik með því að eiga stórleik í kvöld með liði sínu, Nice, í frönsku 2. deildinni þegar liðið lagði Valence á útivelli, 25:22.
Grétar Ari skellti í lás, ekki síst í síðari hálfleik þegar hann fékk aðeins á sig átta mörk. Staðan var jöfn, 14:14, þegar gengið var til búningsherbergja eftir 30 mínútna leik.
Grétar Ari varði 15 skot, 41% hlutfallsmarkvarsla og er óhætt að segja að stórleikur Hafnfirðingsins hafi riðið baggamuninn þegar upp var staðið. Kollegi hans hinum megin vallarins náði sér alls ekki á sama flug og Grétar Ari.
Nice lyftist þar með upp í níunda sæti deildarinnar en gengi liðsins hefur verið upp og ofan á keppnistímabilinu. Ivry, sem féll úr 1. deild í vor, er efst með 22 stig eftir 11 leiki. Dijon og Tremblay koma næst á eftir með 17 stig hvort. Nice er með 12 stig eftir 12 leiki.
